‘O le Fetū Ta‘iala

ʻO Faʻaliliuga Fou

2011-08-06T15:41:00.005-06:00

ʻO le tusiga talu ai, sā ʻou taʻu atu le faʻasalalauina o tusitusiga paʻia e tolu o Le ʻEkalesia a Iesu Keriso o le ʻAu Paʻia o Aso e Gata Ai, ʻua faʻatoʻā toe teuteuina faʻaliliuga. ʻO nei tusi o le Tusi a Mamona, le Matāʻupu Faʻavae ma Feagaiga, ma le Penina Tau Tele.

ʻĀtonu e fesili mai se isi, "ʻĀfai ʻo le afioga a le Atua nei tusi e tolu, ʻaiseā ʻua tatau ona toe teuteuina faʻaliliuga?"

Ia, ona ʻou tali atu lea i ni vāega se lua e faʻapea:

1. Na luaʻi faʻasalalauina ia tusi e tolu i le gagana Igilisi, ʻae lē ʻo le gagana Sāmoa. Ina ʻua taunuʻu atu faifeʻau talaʻi po ʻo misionare a le Ekalesia lea i le atumotu o Sāmoa, ona faʻatoʻā Faʻasāmoaina lea ia tusi mai le gagana Igilisi. Talu mai lenā aso, ʻua toe teuteuina faʻaliliuga ʻina ʻia atili ona saʻo faʻaliliuga i le gagana Sāmoa, ʻina ʻia atili foʻi ona mālamalamagōfie le afioga a le Atua.

2. E oʻo foʻi i le Tusi Paʻia Sāmoa, na toe teuteuina faʻaliliuga seʻia maua le Tusi Paʻia ʻua tātou māsani ai nei. ʻUa ia te aʻu faʻaliliuga ʻeseʻese e lima o le Tusi Paʻia i le gagana Sāmoa. ʻO lea, na ʻou faʻatusatusa faʻaliliuga ʻo iai ʻina ʻia iloa atili i tamaʻi suiga na faia e misionare LMS ma isi ina ʻo Faʻasāmoaina le Tusi Paʻia. ʻO laʻu faʻatusatusaga ʻoloʻo i lalo ifo:

Ioane 3:16 (1849, British and Foreign Bible Society)
Sa faapea lava le alofa mai o le Atua i le lalolagi, ua foai mai lona Atalii e toatasi, ina ia le oti se tasi e faatuatua ia te ia, a ia maua le ola le uma.

Ioane 3:16 (1862, British and Foreign Bible Society)
Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.

Ioane 3:16 (1887, Bible Society in the South Pacific)
Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.

Ioane 3:16 (1969, Bible Society in the South Pacific)
Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.

Ioane 3:16 (2009, Watchtower Bible and Tract Society)
Ona o le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.

E pei ona ʻoutou silafia, e matuā ʻeseʻese le faʻaliliuga mai le 1849 ma le faʻaliliuga mai le 1969. ʻAe tāli tutusa faʻaliliuga mai le 1862, 1887, ma le 1969. ʻAe ʻese foʻi le faʻaliliuga a le lotu Molimau a Ieova lātou.

ʻAʻo le mea e tatau ona manatua, ʻua naʻo le fuaiʻupu lava e tasi lea ʻua tuʻuina atu. ʻO le Tusi Paʻia o le tusi matuā telē tele, ʻai lava e tele suiga na faia i le vā o le tausaga e 1849 ma le 1969.

ʻO lea, e lē se mea fou po ʻo se mea sesē le toe teuteuina o faʻaliliuga o isi tusitusiga paʻia a Le ʻEkalesia a Iesu Keriso o le ʻAu Paʻia o Aso e Gata Ai. ʻUa naʻona mulimuli i tūlagāʻaʻao o ē na Faʻasāmoaina le Tusi Paʻia. E pei ona tātou faitau i le Tusi a Mamona, "ʻāfai e iai ni sesē, ʻo sesē ia o le tagata" na Faʻasāmoaina (Mamona 8:17; ʻua faʻaopoopo faʻamamafa ma koma liliu).

ʻO Tusitusiga Paʻia i le Initoneti

2011-07-31T01:13:00.005-06:00

ʻO le tusiga talu ai na ʻou faʻapea atu, "E lē toe ʻumi ʻae faʻasalalau nei tusi e tolu e le ʻEkalesia i luga o le Initoneti."

ʻAʻo ā nei tusi e tolu ua taʻua? ʻO tusitusiga paʻia ia e maua ai ni isi afioga a le Atua ʻua faʻaalia mai i lana fānau i le lalolagi, ʻae lē ʻo maua i le Tusi Paʻia e masani ai le toʻatele o tagata Kerisiano.

ʻO nei tusi o le faʻataunuuga o lea fetalaiga a le Aliʻi Faʻaola i tagata Iutaia: "ʻUa ia te aʻu foʻi isi māmoe e le ʻo i lenei lotoā; e tatau ona ʻou taʻitaʻiina mai o i lātou foʻi, e faʻalogo foʻi i lātou i loʻu leo; ona tasi ai lea o le lafu māmoe, ma le leoleo māmoe e toʻatasi" (Ioane 10:16; ʻua faʻaopoopoina faʻamamafa ma koma liliu).

ʻO autū o nei tusi e faʻapea:

1. ʻO le Tusi a Mamona

2. ʻO le Mataʻūpu Faʻavae ma Feagaiga

3. ʻO le Penina Tau Tele

ʻO lea, e mafai nei ona e susū atu i lea uepesaite ma faitau i tusitusiga paʻia ia ʻua talanoaina. ʻOu te taʻutino atu ʻoleʻā e sili ona latalata atu i le Aliʻi pe ʻāfai e te faitau ia tusi faʻatasi ma lau Tusi Paʻia.

ʻO Tusitusiga Paʻia: ʻO le Faʻasilasilaga

2011-07-22T12:49:00.005-06:00

ʻUa taunuʻu mai le aso ʻua leva ona faamoemoeina. ʻUa sefulu nei tausaga talu ona ʻou faʻalogo i le teuteuina o tusitusiga paʻia Faʻasāmoa a Le ʻEkalesia a Iesu Keriso o le ʻAu Paʻia o Aso e Gata Ai, lea ʻua iʻu nei i le tuʻu faʻatasi o tusi e tolu i se faʻavaʻa e tasi e pei ona iai i le Faʻaigilisi talu le tausaga e 1981.

ʻO nei tusitusiga paʻia ʻua taʻu atu ʻo le Tusi a Mamona, le Matāʻupu Faʻavae ma Feagaiga, ma le Penina Tau Tele, ʻoloʻo iai le tele o faʻaaliga na maua e le Perofeta ʻo Iosefa Samita.

E lē gata i lea, ʻae iai foi ni vaega fou e fesoasoani i le suʻesuʻe i le tala lelei ia Iesu Keriso, e pei ʻo le Taʻiala i Tusitusiga Paʻia, Faʻamatalaga i Lalo (footnotes), ata ma faʻafanua, ʻātoa ma le faʻasologa o mea na tutupu i le talafaʻasolopito o le ʻEkalesia.

E lua ituʻāiga o faʻavaʻa e mafai ona e faʻatau: ʻo le lomiga ma le faʻavaʻa malū (e $18 [tālā Amerika]) ma le lomiga ma le faʻavaʻa malō (e $7 [tālā Amerika]). E mafai foʻi ona e faʻatau tau o le Tusi a Mamona (e $2.50 [tālā Amerika]) po ʻo le Tusi Paʻia Sāmoa (e $9 [tālā Amerika]) mai lea lava fale ʻoloa faʻainitoneti. (ʻĀ e susū atu i nei uepesaite e faʻatau ni au tusi, e tatau ona e filifili le gagana Sāmoa mai le lisi o gagana ʻeseʻese.)

E lē toe ʻumi ʻae faʻasalalau nei tusi e tolu e le ʻEkalesia i luga o le Initoneti. ʻĀ ʻou faʻalogo i lea mea, ʻoleʻā ʻou taʻu atu i se isi tusiga.

ʻOleʻā ʻou faʻamatala atu nei tusitusiga paʻia e fā i se aso ʻo lumanaʻi ma lo lātou tāua i tagata o Le ʻEkalesia a Iesu Keriso o le ʻAu Paʻia o Aso e Gata Ai (lea ʻua lauiloa ʻo le Lotu Mamona).

ʻO Punāvai o le Vai Ola

2011-07-18T01:04:00.007-06:00

E tele risosi ʻua faʻaavanoaina e Le Ekalesia a Iesu Keriso o le ʻAu Paʻia o Aso e Gata Ai ina ia tātou aʻoaʻo ma mālamalama atili ai i le Tala Lelei i le Aliʻi Faʻaola o Iesu Keriso.

ʻO aʻoaʻoga a le Ekalesia lea e le ni mea lilo, e mafai e soʻo se tasi ona suʻesuʻe i tusitusiga ʻuma a le Ekalesia ina ia mālamalama i mea mātou te talitonu i ai.

Mo se faʻataʻitaʻiga, mātou te talisapaia Iesu Keriso ʻo le Alo moni o le Atua soifua ma le Faʻaola o tagata ʻuma. ʻO le Molimau a le ʻAu Aposetolo ʻoloʻo faʻamatalaina na manumālō Iesu Keriso i le tuʻugamau, na toe tū mai nai le oti, ina ia tātou toe tutū ʻuma ai.

E lē gata i lea, e mafai ona e faitau i aʻoaʻoga a Peresitene o le Ekalesia e pei o Iosefa Samita (Joseph Smith), po o Polika Iaga (Brigham Young), po ʻo Tavita O. Makei (David O. McKay)--lē na susū atu i Sāmoa i le tausaga e 1920 ma ona tupu.

ʻO Le Ekalesia a Iesu Keriso o le ʻAu Paʻia o Aso e Gata Ai ʻo le ekalesia ua lauiloa ʻona ʻo lo mātou faʻatāuaina o le ʻāiga. E mafai ona e faitau i māfuaʻaga ʻua mātou faʻatāuaina le ʻāiga i le ʻĀiga: ʻO Se Folafolaga i le Lalolagi, lea na saunia e le ʻAu Peresitene Sili ma le ʻAufono a Aposetolo e Toʻasefululua.

ʻOu te faʻamoemoe ʻoleʻā e tali le avanoa e aʻoaʻo teisi i talitonuga o ē e ʻau ma Le Ekalesia a Iesu Keriso o le ʻAu Paʻia o Aso e Gata Ai. E pei ona saunoa Peresitene Thomas S. Monson, ʻo le perofeta i onapō nei, ʻo le "tala lelei toefuataʻiina a Iesu Keriso . . . ʻoloʻo maua mai ai tali i fesili [faʻapea: po] ʻo fea na tātou ō mai ai, pe aiseā ʻua tātou i ai iinei, [po] ʻo fea [foʻi] ʻoleʻā tātou ō i ai pe ʻā tātou tuʻua lenei olaga. ʻOloʻo maua mai ai le uiga ma le māfuaʻaga ma le faʻamoemoega i o tatou olaga." (ʻUa faʻaopoopoina faʻamamafa ma koma liliu.)

O le Avanoa Matagofie

2011-06-04T20:22:00.004-06:00

Afai e te tautala Samoa ma tautala Igilisi foi, e mafai ona e fesoasoani i le galuega o le Faasamoaina o le tasi tusi taiala o Le Ekalesia a Iesu Keriso o le Au Paia o Aso e Gata Ai e taʻua, Teachings of the Living Prophets, po o Aoaoga o Perofeta Soifua, pe a Faasamoaina.

O le aso e tatau ona faaiʻu ai lenei galuega o le faaliliuga o le aso 31 o Aokuso, 2011.

Ia susū atu i le uepe saite lea, Helping in the Vinyard, fai sau account, ona ʻamata ai lea o lau galuega o le faaliliu upu!

Afai e iai sau fesili, ia logo mai!

Ia soifua!

ʻO le Alope ma le Leona Maʻi

2011-05-31T14:50:00.002-06:00

ʻO le manatu mo lenei aso e mai le tusi a Misi Palate, ʻO Faataoto ma Tala Faatusa mai Atunuu Eseese:

ʻO le tala taualii, ua gasegase le Leona. Ua solo ane manu uma o le vao e oooo lona pulupulusi. Ua naʻo le Alope ua le i ai. Ona alu lea le fesili ia te ia, Po o le a ea ua ese ai o ia i manu uma, ua faalealofa i le gasegase. Ona sauni lea le tali a le Alope, ua fai mai, ua mataʻu o ia, auā ua oo i le gutu o le ana e taʻoto ai le faatafa o le alii, ua vaai atu, ua ia iloa tulagavae uma ua aga atu i le ana, ae leai ni tulagavae ua aga mai. ʻO lea ua masalo ai o ia, ai lava ua ʻaina ia manu uma e le Leona.

ʻO le faatatau o le tala e faapea:

ʻO le Leona, o le tiapolo lea; ua faia e ia mailei e maua ai nisi. ʻO le Alope, o le tagata mafaufau lea; ua na mataulia i latou o e ui atu i le ala o le tiapolo, e oti i latou; o le mea lea e fefe o ia e ui ai.

Sa faapea foi ona fetalai le Alii Faaola o Iesu Keriso i ana soo:

ʻAua foi tou te matataʻu i e fasioti le tino, ae latou te le mafaia ona fasioti le agaga; ae lelei ona outou matataʻu i le ua mafai ona fano ia te ia le agaga atoa ma le tino i Kēna. (Mataio 10:28)

‘O le Vaivai o le Fe‘e

2010-12-05T18:41:00.001-07:00

Na ‘ou ‘avea ma misionare po ‘o faife‘au tāla‘i i Sāmoa ma Amerika Sāmoa i le tausaga e 2001 se‘i o‘o i le 2003. Ina o mātou a‘oa‘o i ē sā fia fa‘alogo i la mātou sāvali iā Iesu Keriso ma lana tala lelei, na māsani ona mātou fa‘aaogā ni alagā‘upu po ‘o muāgagana e fa‘amalieina ma fa‘afaigofieina a mātou fa‘amatalaga. E tele lava ni alagā‘upu po‘ o muāgagana e mafai ona fa‘atatau i se uiga fa‘aleagaga. ‘O le atamai fa‘a‘uputu‘u o le Fa‘asāmoa e mafai ona fa‘alatalata atu atili ai i le Atua.

‘O le tasi muāgagana na fa‘aaogā ‘o le ‘upu i le vaivai o le fe‘e. E ui ina foliga mai e vaivai le fe‘e talu le malū ma le mālomilomi o lona tino, e moni e matuā mālosi lava le fe‘e. Ina o ‘au‘auna a‘u i Sāmoa, sa fa‘amatalaina iā te a‘u, o ali‘i fāgota fe‘e e māsani ona su‘e ni fe‘e lāiti. Na ‘ou fesili pe ‘aiseā e lē fia su‘e fe‘e tetele, ona tali mai lea iā te a‘u, e māfua i le faigatā o fe‘e lāpopo‘a. ‘Ā pipi‘i ‘ave o le fe‘e lāpo‘a i le lima po ‘o le vae o le ali‘i fāgota, ma pipi‘i isi ‘ave i le a‘au po ‘o se ma‘a, ‘ai lava ‘ole‘ā oti lenā tagata fāgota.

E mafai ona fa‘atatau le mālosi o le fe‘e i le mālosi fa‘atosina o fa‘aosoosoga ma agasala. ‘O aso ‘uma lava e feiloa‘i tātou ma avanoa e agasala ai. ‘O le tele o taimi, e foliga mai o mea ‘olo‘o fa‘atosina i tatou ‘o ni mea e lē āfāina ai i tatou, e pei ona mana’omia se fe’e lāpo’a e se ali’i e tatau ona fafagaina lona ‘āiga. Peita’i, e lē tatau ona tātou tā‘a‘alo ma le mala o le agasala. ‘O le ta‘alo ma le agasala e na‘ona ta‘ita‘i i tātou i le fa‘anoanoa ma le mala. E i‘u ina tātou mālamalama i le ‘upu, “‘O le amiolega e lē‘o le fiafia lea.” Na fa‘apea ona tusia e le Aposetolo ‘o Iakopo, “’A ‘ua ta‘itasi ma fa‘aosoosoina, pe ‘ā tosina ma maileia i lona lava tu‘inanau; pe ‘ā tō le tu‘inanau ona fānau mai ai lea ‘o le agasala; ‘ā matua le agasala ona fānau mai ai lea o le oti” (Iakopo 1:14-15).

O le Togiola

2010-09-11T10:04:00.004-06:00

Ua ou mafaufau soo i lenei vaiaso i le togiola a Iesu Keriso. I le Ekalesia a Iesu Keriso, e faaautuina mea uma i le togiola. Ou te talitonu e mafai ona aafia vaega uma o tatou olaga i le togiola. E moni e faaaoga le togiola mo le salamo, masalo o le mea sili ona taua lena. Peitai, e le gata i lea aafiaga o le togiola. E mafai ona tatou liliu atu i le Faaola mo soo se mea e manaomia, tusa po o le faamafanafanaga i taimi o le faanoanoa, po o le malosi e manaomia i taimi o vaivaiga, pe soo se taimi e atuatu ai vale le loto. Soo se mea lava e manaomia, e tatau ona tatou aapa atu i le Faaola mo lona alofa ma fesoasoani. I lo'u lava olaga, ou te tatalo mo le fesoasoani mo mea taua atoa foi ma mea faatauvaa. E le tatau ona faalagolago i le alii nao i taimi o faafitauli tele. Peitai, e faalagolago ia te ia i soo se mea lava e popole ai le loto. O a'u lava, a ou manaomia se fesoasoani, ou te tatalo atu mo se vavega, o le upu tonu lena ou te faaaoga. Soo se mea itiiti lava ou te manaomia ai se fesoasoani, ou te ole atu ma le faatuatua mo se tamai vavega e tupu i lo'u olaga ina ia manuia ai lo'u olaga. a faapea e tatalo atu ma le faatuatua ma le loto maulalo mo mea e tatau ai, o le a oo mai le faamanuiaga pe a tutusa tatou loto ma le finagalo o le Alii. O mafai ona faataunuu nei faamanuiaga e le Alii ona o lona togiola mo i tatou. Ou te taumafai i aso uma e manatua le alofa tunoa o le Alii ma lona finagalo e fesoasoani mai ia taita. E ui ina ou vaivai, e sili ona malosi o Ia. E ui ina ou le atoatoa ona lelei, e atoatoa o ia. Ona o lona alofa atoatoa, na faataunuuina lona togiola. Ona o lona togiola, e mafai ona oo mai vavega ofoofogia ma patino i tagata taitoatasi i lenei olaga. E le atoatoa lo'u faatuatua i le Alii, ae ou te faalagolago pea ia te ia e fesoasoani mai i o'u vaivaiga ma faamalosi mai i lo'u faatuatua.

‘O le Fa‘atuatua e O‘o mai ai Fa‘amanuiaga ‘Uma

2010-07-20T23:32:00.009-06:00

‘O le Mea Alofa a le Agaga Pa‘ia: ‘O le Tautala i Gagana Fou

Oloo fai mai le fetalaiga a le Alii Faaola: "E mulimuli atu foi nei faailoga i e faatuatua…e tautalatala i latou i gagana fou" (Mareko 16:17). Na faato'ā ou tautala i le gagana Sāmoa ina ua amata la'u misiona i le 2001. O lenei, ua atoa nei le 7 tausaga talu ona uma la'u misiona, a e mafai pea ona ou tautala Sāmoa. Ou te lē mitamita ona o a'u, ae ou te mitamita ona o le Atua ma lona agalelei. Ua avea le gagana Sāmoa ma mea alofa po o se matupalapala i lo'u olaga. E lasi faamanuiaga ua ou maua ona o lenei mea alofa.

A o le mea moni, o nisi Sāmoa e matuā ofo pe 'ā ou tautala Sāmoa. Ou te masalo e tau lē masani i latou i le valo'aga a le Alii: "…E oo ina faalogo…tagata ta'ito'atasi i le faaatoatoaga o le tala lelei i lana lava tautala ma lana lava gagana, mai ia i latou ua faauuina i lea mana, i le ta'ita'iga a le Fesoasoani, e liligi ifo ia te i latou mo le faaaliga a Iesu Keriso" (MF&F 90:11).

O le Tala ia Palaamo ma lona Asini

Tou te silafia uma le tala ia Palaamo ma lana asini i le Feagaiga Tuai: Na tula'i Palaamo ma faanofoa lana asini ma ō faatasi ma alii o Moapi ina ia fetuu le fanauga a Isara'elu (Numera 22).

Ae na tupu le "toasa o le Atua ina ua alu o ia; [na] tu mai foi le agelu a Ieova i le ala e tetee ia te ia" (Numera 22:22), "sa i lona lima lana pelu ua se'i" (Numera 22:23) e fasioti Palaamo.

E faatolu ona vaaia le agelu e le asini; e faatolu foi ona 'alo ese le asini pe ta'oto i lalo i le ala ma faasaoina ai le ola o Palaamo; e faatolu foi ona sasa e Palaamo lana asini.

"Ona faagaganaina lea e Ieova o le asini" (Numera 22:28), i le ua a'oa'i ai o ia i lona matai o Palaamo.

Uso e ma tuafafine, a mafai e le Alii ona faagaganaina se asini i onapo o le Feagaiga Tuai, e matuā mafai lava ona Ia faagaganaina se pālagi i onapo nei ina ia tautala Sāmoa.

O le Vafealoa'i

"O le faavae moni o le Faasāmoa, o tagata Sāmoa lava ma o latou uiga faaalia." (1) O le tasi uiga masani nei o tagata Sāmoa ou te fia tautala ai: o le vafealoa'i.

O le vafealoa'i o le tasi lea o uiga pito sili ona tāua i le Faasāmoa. O le va o le avanoa po o le space; e mafai ona va lalata pe va mamao mea e lua po o tagata e to'alua. O le pogai o le upu fealoa'i o le alo, o lona uiga o luma, po o talāluma. A fealoa'i tagata e to'alua, e faafesaga'i lelei o la'ua fofoga ma o la'ua tino. O le vafealoa'i la, o le avanoa lea i le va o tagata e toalua ua fealoa'i pe faafesaga'i. O le upu faapālagi e tai tutusa lona uiga ma le upu vafealoa'i o le relationship. E fua le va i tulaga o tagata oloo fealoa'i. O le faata'ita'iga: e ese le vafealoa'i a tamalii, ese foi le vafealoa'i a le ulugalii, ese foi le vafealoa'i a mātua ma fanau. A lē teu faalelei le va a nei vaega uma, ona tupu mai ai lea o le misa.

O le tagata ua maua le vafealoa'i e faatino mai ai lagona o le fiafia, tausaafia, alofa, ma le 'oli'oli. E lē toe itagofie, auā ua iloa fo'ia faafitauli i ala faaaloalo ma le filemu. Na te iloa foi o le ala i le pule le tautua. O lea, e lē toe fiasili pe faasausili pe fiatagata, a ua malie lona loto i le avea ma tautua a le 'āiga, ona uso a tagata, ma matai, ae maise le Atua.

O uiga nei e faamaonia ai le vafealoa'i: o le migao, ava, alofa, ma le faaaloalo. O nei uiga e faatinoina ai le vafealoa'i. O le faata'ita'iga: E lē o se tulafono a Le Ekalesia a Iesu Keriso o le 'Au Pa'ia o Aso e Gatai ai (o le lotu Mamona) le fafagaina o faifeau tala'i, ae ona o le alofa ma le faaaloalo o tagata Sāmoa, e faia fafaga a faifeau tala'i i aso uma lava. E lē faapea foi e tuu ni lelei ae aumai ni māsei, e leai. A fai le fafaga a le 'āiga Sāmoa, e matua fai a! Ou te fiu i 'ai i a matou fafaga i le misiona, ae sau pea lava le tama'ita'i po o le taule'ale'a e toe ligi mai le koko, pe toe asu mai foi le mea 'ai.

O le tasi mea e faavaeina ai le vafealoa'i o le faaaloalo. Ae faavaeina le faaaloalo i le alofa. E tai uiga tutusa le upu faaaloalo ma le ava po o le migao. O uiga faaalia o le tagata, e iloa ai pe faaaloalo pe leai. 'A faavaeina lana gagana i le faamolemole, faafetai, ma le faatulou, o le tagata faaaloalo lea. O upu faaaloalo e ave i tagata e tatau i ai le faaaloalo, e pei o tamālii, mātua, tamā ma tinā mātutua, ma le aufaigaluega a le Atua.

A'oa'o Alo ma Fanau

E tāua tele ona a'oa'o alo ma fanau ina ia latou mālamalama i le gagana Sāmoa ma le vafealoa'i. Atonu o le tasi mafua'aga ua lavea le to'atele o alii ma tama'ita'i talavou i kegi o le lē mālamalama i le vafealoa'i ma le aganuu a o latou tua'ā. Atonu o le mafua'aga foi lea e lē mālamalama isi o alo ma fanau i le tala lelei: e tele ina Faasāmoa i le ualota, ae lē mālamalama i ai nisi o alo ma fanau.

Ou te iloa oloo tatou nonofo i Amerika, e fai faapālagi mea uma. Peita'i, ina ne'i mou atu le faasinomaga Sāmoa o alo ma fanau, e tatau ona tatou to'aga e a'oa'o i latou, e tusa lava pe faigatā tele. Ia tatou manatua upu a le pese:

Pe 'ā faigatā le ala, taumafai!
Pe 'ā oo mai se mala, taumafai!
Pe 'ā oo ina tagi, ia tepa i le lagi;
Ua teu ai nei le taui, taumafai!

'Aua e te faavaivai,
I mea faigatā;
[E] tele mea e maua ai
'A i'u puapuagā.

O le Faatuatua o Tagata Sāmoa

O tagata Sāmoa o le nuu e tele lo latou faatuatua. Ae le'i taunuu atu le tala lelei i Sāmoa, sa faatuatua Sāmoa i atua e pei o Tagaloa. Ae ina ua taunuu atu Ioane Viliamu i Sapapalii i le Savali o le Filemu (Messanger of Peace) i le 1830, sa amata loa ona talitonu ma faatuatua Sāmoa i le Atua soifua o Aperaamo, ma Isaako, ma Iakopo. Sa amata foi ona faatuatua Sāmoa i le Alo o le Atua ma le Faaola o tagata uma, o Iesu Keriso lava lea.

Ina ua ou taunuu atu i Sāmoa e amata le galuega, ona faato'ā ou mālamalama lea o Sāmoa o le nuu faatuatua tele i le Atua. A tā le logo o le sā i le afiafi, pe ili foi le pu, e toe foi tagata uma i o latou lava 'āiga e usu viiga ma tatalo atu i le Atua. Sa faamafanafanaina lo'u loto ma faamalosia foi lo'u lava faatuatua i lo'u auai atu i faigālotu ia i afiafi uma a o faamisiona a'u i Sāmoa.

O le Faatuatua o Taulauniu

Ou te fia talanoa nei i faata'ita'iga e lua o le faatuatua sa ou vaaia i la'u misiona i Sāmoa. O le tasi, o le faata'ita'iga a Taulauniu, o le loomatua sa ma'i i le vae tupa. Sa tau lē mafai ona ia tu pe savali ona o le faigatā o lona ma'i. Ana o a'u, po ua ou lē mafaia ona onosa'i se ma'i faapenā. Ae peita'i, ona o lona faatuatua ia Iesu ma lona talitonu i le toetu i aso amuli, sa lē mafai lava ona faanoanoa Taulauniu. O le faatuatua o Taulauniu ua pei le faatuatua o Iopu: "Auā ua ou iloa, oloo soifua lē na te togiolaina a'u; o aso amuli foi e tula'i mai ai o ia i luga o le eleele. E ui lava foi ina faaumatia lenei tino…ae ou te iloa atu le Atua i lo'u tino" (Iopu 19:25-26).

O le Faatuatua o Milovale

O le isi tala i le faatuatua o le Sāmoa, o le tala i le loomatua o Milovale. O Milovale o le tinā matua lava, ma na malaga o ia mai i tuā i Upolu ma nofo i le fale o lana tama teine i le mea e ta'ua o le Vilimaa e latalata i Pesega. Ina o tala'i ma'ua ma la'u soa, sa masani ona ma ō e asi le 'āiga o le tama teine o Milovale. Sa lotu Katoliko i latou. A o Milovale o le tasi o Le Ekalesia a Iesu Keriso o le 'Au Pa'ia o Aso e Gata ai. Ae talu ona nofo i le Vilimaa, pe tusa ma le tolu masina, sa le'i maua e ia se avanoa e auai i sauniga lotu o le ualota.

O le tasi aso, ina o fai ma asiasiga, sa ma fesili ia Milovale pe na te auai i sauniga lotu pe afai ma te auina atu se auala e momoli ia te ia i le fale sa. Sa ioe mai Milovale ma le fiafia. Sa lata i le Aso Sa, o lea, sa ma fai atu ia Milovale ai e lē alu atu se taavale se'i oo i le isi Aso Sa i tua atu.

O lena tausaga na muamua ai sauniga lotu o le ualota pālagi i Aso Sa uma. O lea, talu ona ma tala'i foi i le ualota pālagi, na auai i ma'ua i o latou sauniga lotu. O le tasi Aso Sa, ina o faalogologo i ma'ua i le failauga i le ualota pālagi, na oo mai le sāvali mai i fafo faapea ua ō mai le loomatua ma lana tama teine i le fale sa, ua la su'e faife'au tala'i.

Sa ō atu i ma'ua ma la'u soa i le mea sa iai i la'ua, a o Milovale ma lana tama teine sa tutū mai i fafo o le fale sa. Sa sāvavali i la'ua mai le Vilimaa i le aasa o le la ma le pefu o le auala ina ia auai i sauniga lotu. A o le mea moni, ina ua amata ona sāvavali, sa la le'i iloa po o fea le fale sa.

Ina o talanoa matou ma Milovale, sa fai mai o ia na te fia totogi lana sefulua'i ina ia toe lelei i la'ua ma le Alii, na te fia foa'i atu foi sina tupe e fesoasoani i le misiona a lana tama tane i Niu Sila. Ou te le'i vaaia le tupe sa ia fafao i le teutusi, ae ou te manatu sa tusa ma tupe iti na lafo e le fafine mativa ua oti lana tane e pei ona ta'ua i le Feagaiga Fou (tagai i le Mareko 12:42-44; Luka 21:2-4).

O le faatuatua tele o lenei loomatua na uuna'ia ai o ia ia alu ese ai le fale o lana tama teine ina ia auai i sauniga lotu o se ualota sa lē masani ai o ia. Sa taunuu atu o ia i le fale sa i le lua ma le afa itula ae le'i amataina sauniga o le ualota Sāmoa, ae nofo pea o ia; ona auai lea o ia i itula uma e tolu. Ina ua mae'a sauniga uma o le ualota Sāmoa, sa toe momoli ia te i la'ua ma lana tama i lo la'ua fale e se tasi o le ualota.

Atonu sa faigofie ia Milovale le savali i le fale sa i le aasa o le la e aunoa ma se vai e faamalieina ai lona fia inu, ae ana lē seanoa lona faatuatua, po ua lē alu. O lona faata'ita'iga e faaali mai o le faatuatua o le mata'upu faavae o le galuega po o le faatinoga, ae lē na'o le talitonu. O lona faatuatua i le Faaola toetu na uuna'ia ai Milovale ia auai i sauniga lotu i lena taeao e tusa pe faigatā le ala.

O lo'u molimauina o le faatinoga o le faatuatua o Milovale sa faamalosia lo'u lava faatuatua. Sa faateleina foi lo'u fia avea ma sē e 'ana'ana i le upu, ae lē na'o faalogologo i ai, e pei ona tusia e le Aposetolo o Iakopo (taga'i i le Iakopo 1:22). O lea, e moni, "o mea faatauvaa…ua faataunuuina ai mea tetele" (Alema 37:6); o lona uiga, a tatou vaai i faata'ita'iga o le faatuatua moni ia Keriso e faatinoina e isi, e faamalosia mana'oga i o tatou loto i le malosi o lo latou faatuatua ina ia tatou ola atili i le faatuatua. E faapea lava le mana o le molimau moni.

1. Simanu, Aumua Mataitusi. 2002. 'O Si Manu a Alii: A Text for the Advanced Study of Sāmoan Language and Culture. University of Hawaii Press, pg. 63

O le Lotu Moni

2010-06-28T19:36:00.004-06:00

Se'i tatou mafaufau i le tala faata'oto o le Aute ma le Talo:

Ua toulu mai le Aute, ua pau i tafatafa o le Talo. Ona faapea lea a le Aute, Ta 'ino'ino i lenei mea eleelea. Ua tali atu ai le Talo, E moni, ua matagofie oe ; a e mavaegofie lou matagofie, e le aulia le aso taeao. E leai foi sou aoga, na ona teu ai tino o tagata. A o a'u nei e aoga e malosi ai tino o tagata.

Ona tuu maia lea e Misi Palate le faatatau:

O le Aute, o le lotu sese lea, e teuteu ia matagofie, a e leai sona aoga. O le Talo, o le lotu moni lea, e maoona ai ma ola ai tagata i le ola e faavavau.

Sa faapea ona fetalai Iesu Keriso, "Pe a e tatalo, aua ne'i e pei o tagata pepelo, auā ua latou fia tutū ma tatalo i sunako ma fetaulaigāala, ina ia iloa i latou e tagata. E moni, ou te fai atu ia te outou, ua maua e i latou lo latou taui.

"A o oe, pe a e tatalo, ina ulu atu ia i lou afeafe, ma pupuni lona puipui, i le e tatalo ai i lou Tamā o i le mea lilo; o lou Tamā foi o lē silasila i le mea lilo, na te avatu faaaliali se taui ia te oe.

"A outou tatalo, aua ne'i tāutu i a outou upu, e pei o nuu ese; auā fa tei latou, o le tele o a latou upu e talia ai i latou.

"O lenei, aua ne'i outou faapei o i latou; auā ua silafia e lo outou Tamā mea ua outou matitiva ai, a o lei ole atu outou ia te ia." (Mataio 6:5-9)

Ou te iloa e talia e le Atua a tatou lotu--po o tatalo--moni uma. Ua ou iloa le faataunuuga o lenei mata'upu i lo'u lava olaga, o lea, ou te viia ai le suafa o le Alii.

(Ua sii le tala i le Aute ma le Talo ai le tusi a Misi Siaosi Palate, O Faataoto ma Tala Faatusa mai Atunuu Eseese, itulau 71.)

O Lo'u Malamalamaga o le Faasamoa

2010-03-26T03:16:00.004-06:00

E faatulou atu i le pa'ia o le atunuu, ae magalo lo'u leo. Ole'a sosopo le manuvale i le fogatia. Ia viia le Atua, aua ua tatou fesilafa'i i le pu'e o manu, ae le o le pu'e o mala; i alo o nuu ae le o tua o nuu. Faafetai i le Atua ona ua tatou feiloa'i i le magafetau soifua e pei o lea upu a Leutogitupa'itea; ua tatou fesilafa'i i le va i lupe maua, ae le o le va i lupe sa'a.

O le matua o la'u lauga e faapea: O le a sou malamalamaga o le Faasamoa? Ia, se'i o'u taumafai atu, ia tapua'i maia.

Oloo faapea le upu a le atunuu: "O Samoa ua uma ona tofi."[i] A o a'u, o a'u o le palagi mao'io'i a. Oloo faapea le upu, "E le aia moo i liu o vaa," e leai so'u faia po o aia moni i le Faasamoa, aua e leai so'u toto Samoa. O fea la ou te ofi atu ai i le Faasamoa? Pe iai se tulaga mo a'u i le Faasamoa?

Ou te talitonu e iai. Oloo fai mai le fetalaiga a le Alii Faaola: "E mulimuli atu foi nei faailoga i e faatuatua…e tautalatala i latou i gagana fou" (Mareko 16:17). Faato'a ou tautala i le gagana Samoa ina ua amata la'u misiona mo Le Ekalesia a Iesu Keriso o le Au Paia o Aso e Gata Ai i le 2001, a ua 19 tausaga o lo'u olaga. O lenei, ua atoa nei le 28 tausaga o lo'u olaga, a ua mafai pea ona tautala Samoa. Ou te le mitamita ona o a'u, ae ou te mitamita ona o le Atua ma lona agalelei. Ua avea le gagana Samoa ma mea alofa po o se matupalapala i lo'u olaga. E lasi faamanuiaga ua ou maua ona o lenei mea alofa. Faafetai i le Atua i lona faia o a'u ma tama fai i le Faasamoa.

O le Faavae Moni o le Faasamoa
E pei ona tusia, "O le faavae moni o le Faasamoa, o tagata Samoa lava ma o latou uiga faaalia."[ii] O uiga masani nei o tagata Samoa ou te fia tautala ai: o le vafealoa'i, faatuatua, ma le agaga fiafesoasoani.

O le Vafealoa'i
O le vafealoa'i o le tasi lea o uiga pito sili ona taua i le Faasamoa. O le va o le avanoa po o le space; e mafai ona va lalata pe va mamao mea e lua po o tagata e to'alua. O le pogai o le upu fealoa'i o le alo, o lona uiga o "luma," po o "talaluma." A fealoa'i tagata e to'alua, e faafesaga'i lelei o la'ua fofoga ma o la'ua tino. O le vafealoa'i la, o le avanoa lea i le va o tagata e toalua ua fealoa'i pe faafesaga'i. E fua le va i tulaga o tagata ta'ito'atasi o fealoa'i. O le faataitaiga: e ese le vafealoa'i a tamalii, ese foi le vafealoa'i a le ulugalii, ese foi le vafealoa'i a matua ma fanau. A le teu faalelei le va a nei vaega uma, ona tupu mai ai lea o le misa. O le isi foi upu faapalagi e tai tutusa lona uiga ma le upu vafealoa'i o le relationship.

O le tagata ua maua le vafealoa'i e faatino mai ai lagona o le fiafia, tausaafia, alofa, ma le 'oli'oli. E le toe itagofie, aua ua iloa fo'ia faafitauli i ala faaaloalo ma le filemu. Na te iloa foi o le ala i le pule le tautua. O lea, e le toe fiasili pe faasausili pe fiatagata, a ua malie lona loto i le avea ma tautua a le aiga, ma matai, ma le Atua.

O uiga nei e faamaonia ai le vafealoa'i: o le migao, ava, alofa, ma le faaaloalo. O nei uiga e faagaoioia le vafealoa'i. O le faata'ita'iga: E le o se tulafono a le matou ekalesia le fafagaina o faifeau tala'i, ae ona o le alofa ma le faaaloalo o tagata Samoa e faia fafaga a faifeau tala'i i aso uma lava. E le faapea foi e tuu ni lelei ae aumai ni masei, e leai.[iii] A fai le fafaga a le aiga Samoa, e matua fai a! Ou te fiu i 'ai, ae sau pea lava le tamaitai po o le taule'ale'a e toe ligi mai le koko, pe toe asu mai le mea ai.

O le Faatuatua
O tagata Samoa o le nuu ua tele lo latou faatuatua. Ae le'i taunuu atu le Talalelei i Samoa, sa faatuatua Samoa i atua e pei o Tagaloa po o Nafanua. Ae ina ua taunuu atu Ioane Viliamu i Sapapalii i le Savali o le Filemu (Messanger of Peace), sa amata loa ona talitonu ma faatuatua Samoa i le Atua soifua o Aperaamo, ma Isaako, ma Iakopo – o le Atua lea o le Tusi Paia. Sa amata foi ona faatuatua Samoa i le Alo o le Atua po o le Faaola o tagata uma, o Iesu Keriso lava lea.

Sa faapena lava ona valaaulia a'u e avea ma faifeau tala'i i Samoa ma Amerika Samoa mo Le Ekalesia a Iesu Keriso o le Au Paia o Aso e Gata Ai i le tausaga e 2001 seia oo i le 2003. Ina ua ou taunuu atu i Samoa e amata le galuega, ona faato'a ou malamalama lea o Samoa o le nuu faatuatua tele i le Atua. A ta le logo o le sa i le afiafi, pe ili foi le pu, e toe foi tagata uma i o latou lava aiga e usu viiga ma tatalo atu i le Atua. Sa faapena ona faamafanafanaina lo'u loto ma faamalosia foi lo'u lava faatuatua i lo'u auai atu i faigalotu ia i afiafi uma a'o faamisiona a'u i Samoa.

O le tasi faataitaiga maoa'e o le faatuatua o le Samoa ua ou iloa, o le faataitaiga a Taulauniu Sae, o le loomatua ua ma'i i le vae tupa. Sa tau le mafai ona ia tu pe savali ona o le faigata o lona ma'i. Ana o a'u po ua ou le mafaia ona onosai le faanoanoa. Ae peita'i, ona o lona faatuatua ia Iesu ma lona talitonu i le toetu i aso amuli – po o le toe tuufaatasiga lea o le agaga ma le tino ua faaatoatoaina, e le toe oo i ai le oti po o se ma'i – sa le mafai lava ona faanoanoa Taulauniu. O le faatuatua o Taulauniu ua pei le faatuatua o Iopu: "Aua ua ou iloa, oloo soifua le na te togiolaina a'u; o aso amuli foi e tula'i mai ai o ia i luga o le eleele. E ui lava foi ina faaumatia lenei tino pe a mavae atu lo'u pa'u, ae ou te iloa atu le Atua i lo’u tino" (Iopu 19:25-26). Talu mai aso anamua, ua avea le faatuatua ma vaega taua o le Faasamoa.

O le Agaga Fiafesoasoani
O le isi uiga e faavaeina ai le Faasamoa o le agaga fiafesoasoani. Talu ona uma la'u misiona i Samoa ma Amerika Samoa, ua tele faamanuiaga ua ou maua, po ua maua foi e lo'u aiga, mai Samoa ua iai le agaga fiafesoasoani.

Se'i o'u faamatala atu ni faataitaiga e lua. Muamua, o le tausaga lea e 2003 sa faapena ona malaga i ma'ua ma la'u aumea Hawaii mai Utah i le nuu o lo matou aiga i Idaho, aua le Kerisimasi. Sa malaga i ma'ua i le pasi lea ua ta'ua o le Greyhound. E le se mea faigofie le malaga i le pasi, aua e malaga i le po lava, o le umi foi o le malaga po ua tusa ma le iva itula.

Ina ua taunuu atu i ma'ua i le mea e sui ai pasi, ona ave lea a ma'ua ato i alii e teu ato i totonu o le pito i lalo o le pasi. Ua taga'i le tasi alii i a ma ato, ona faapea mai lea, "E le mafai ona teu nei ato, aua e leai ni faailoga e iloa ai le mea e te lua malaga i ai." Ua ma tete'i, aua ua leva talu ona faatau o ma pasese ae e le'i ta'u mai e se tasi e tatau ona fai ni faailoga i ma ato. Ua ou iloa atu le pine a le tasi alii, o lona igoa o Tavita. Ona ou faapea atu lea, "E te malaga mai Samoa?" Ona tali mai lea o Tavita, "Ioe! Sa e faamisiona i Samoa?" Ua ou ioe atu i ai, ona faapea lea o Tavita i le la te galulue faatasi, o le Samoa foi o ia, "Ia ave ato ia a nei tama ma tuu i ai ni faailoga, aua ua toeitiiti alu le pasi, e tatau foi i nei tama ona taunuu atu i le nuu la te malaga i ai atoa ma a la'ua ato." Ana leai nei alii Samoa e to'alua ma lo la'ua agaga fiafesoasoani, po ua le mafai ona ma taunuu atu ai ma le manuia e faamanatu le Kerisimasi ma lo matou aiga i Idaho.

O le isi faataitaiga o le agaga fiafesoasoani ua tupu talu ai nei. Sa malaga i ma'ua ma lo'u to'alua i Hawaii ia Iulai o le tausaga nei ina ia ou a'oga i le Iunivesite o Hawaii i Manoa. E leai se ma fanau, o lea sa amata loa e lo'u to'alua, o Tepora, ona saili se galuega. E tele pisinisi sa ia apalai i ai, ae sa le'i maua lava se galuega. Sa oo ina auai i ma'ua i se sauniga lotu i le tasi aso, na ma feiloa'i ma le Samoa e igoa ia Iva. Sa matou talanoa, ona fesili mai lea o Iva ia Tepora po ua maua sana galuega. Ua tali atu ia, "E leai, e le'i maua lava." Ona faapea mai lea o Iva, "Ia, so'u fesili solo i le mea ou te faigaluega ai, pe iai se galuega mo oe." E le gata ina ia fesili solo pe iai se galuega mo lo'u to'alua, ae sa ia momoli foi Tepora i le mea na te faigaluega ai, sa faafeiloa'i la'ua ma le pule a'oga, ma sa i'u ina maua e Tepora sana galuega lelei e fai.

Ia, ua ou talanoaina nei i ni vaega e tolu ua faavaeina ai le Faasamoa: o le vafealoa'i, faatuatua, ma le agaga fiafesoasoani. E! Samoa e! Aua ne'i galo le Faasamoa. Aua ne'i mou atu foi la outou measina lea; aua o le Faasamoa e mamalu ai Samoa uma i le lalolagi atoa.

A sau se itula e taape ai le filialii, ia alofa le Atua ia malu puipuia o outou soifua. Ia lagimaina o outou soifua, ae ou ola foi. A tatou tuua, ia tatou faamavae i le mavaega a alo o tupu: Ia tu Ieova i lo tatou va. Soifua!

[i] Simanu, Aumua Mataitusi. 2002. 'O Si Manu Alii: A Text for the Advanced Study of Samoan Language and Culture. University of Hawaii Press, pg. 68.

[ii] Simanu, Aumua Mataitusi. 2002. 'O Si Manu Alii: A Text for the Advanced Study of Samoan Language and Culture. University of Hawaii Press, pg. 63.

[iii] Murdock, George T. Jr. 1965. O le va fealoai. Pesega [Western Samoa]: The Church of Jesus Christ of Latter-day Saints.

O le Mana ma le Pule a Perofeta ma Aposetolo e mai le Atua ia

2009-03-10T18:11:00.002-06:00

Se'i tatou faaauau pea la tatou talanoaga i le mataupu o perofeta ma aposetolo. O ona po o Iesu Keriso, sa "faapotopotoina [ai] e ia ona soo e toasefulu ma le toalua, ua tuu atu ia te i latou le mana ma le pule i temoni uma, ma ia faamalolo i ma'i;" (Luka 9:1) ua avatu foi ia i latou ki o le malo o le lagi: "o se mea foi [latou] te fusifusia i le lalolagi, e fusifusia foi lea i le lagi; o se mea foi [latou] te tālā i le lalolagi, e tatalaina foi lea i le lagi" (Mataio 16:19).

Sa faapea foi ona fetalai atu Iesu i ona soo, "Ua le filifilia a'u e outou, a ua filifilia outou e a'u" (Ioane 15:16); e le gata foi i lea, sa tusia e le aposetolo o Paulo e faapea, "E le fai fua foi e se tasi lenei faiva mamalu, tau o le ua filifilia e le Atua, e faapei o Arona foi" (Eperu 5:4).

O le "faiva mamalu" o le perofeta po o le aposetolo e le faia fua lava e se tasi. E filifilia e le Atua perofeta ma aposetolo i le ala lava e tasi na filifilia ai Arona, le uso o Mose. O le ala lea o le faaaliga.

Sa faaalia e le Atua lona finagalo ia Mose i afioga e faapea, "Ia e faalatalata mai foi ia te oe o lou uso o Arona...ai le fanauga a Isaraelu, ina ia fai ma ositaulaga ia te au..." (Esoto 28:1). E le'i alu Arona ia Mose ma fai atu i lona uso, "Sole e, ia e fai a'u ma ositaulaga i le Alii." Ae na faaalia e le Atua lona finagalo i lana auauna, o le perofeta lea o Mose (Ia taga'i i le Amosa 3:7).

A filifilia e le Atua se perofeta po o se aposetolo, e tuuina atu foi ia te ia le mana ma le pule a le Atua atoa ma ki o le malo o le lagi. O nei mea e tolu (o le mana, ma le pule, ma ki o le malo o le lagi) e mafai ai e le perofeta po o le aposetolo ona galue ma tautala i le suafa o le Alii o Iesu Keriso.

O le mana ma le pule foi ia e papatisoina ai isi pe faaeeina atu lima e tuu atu ai le mea alofa o le Agaga Paia. Se'i tatou faitau faatasi i ni tala i lenei lava mana ma pule.

"Ua o ae faatasi Peteru ma Ioane i le malumalu i le itu aso e fai ai le tatalo...

"Ua ave foi le tasi tagata ua pipili talu ina fanau mai, ua tuuina ifo o ia e i latou i aso fai soo i le faitotoa o le malumalu ua igoa i le Matagofie, e faatoga atu i se mea alofa i e ulu atu i le malumalu;

"Ua iloa mai e ia o Peteru ma Ioane a ulu atu i le malumalu, ona faatoga lea o ia i se mea alofa.

"Ona pulatoa lea o Peteru ma Ioane ia te ia, ua faapea atu, Vaai mai ia ia te i maua.

"Ona naunau mai lea o ia ia te i laua, fā'i e maua se mea mai ia te i laua.

"Ona fai atu lea o Peteru, E leai sa'u ario po o sa'u auro; a o le mea ua ia te au, ou te avatu lea ia te oe, O le suafa o Iesu Keriso o le Nasareta, ina tu ai ia i luga, ina savali.

"Ua tago atu foi o ia i lona lima taumatau, ua faatu ia te ia i luga; ona faamalosia loa lea o ona vae ma ponaponāvae.

"Ua oso ia i luga ma tu, ua savali foi, ua ulu faatasi foi ma i laua i le malumalu, o loo savali ia, ma oso, ma vivii atu i le Atua" (Galuega 3:1-8).

O le isi tala:

"Ua faalogo foi le au aposetolo i Ierusalema, ua talia e Samaria le afioga a le Atua, ona latou aauina atu lea o Peteru ma Ioane ia te i latou.

"Ua o mai foi i laua, ona tatalo lea mo i latou, ina ia maua e i latou le Agaga Paia;

"Auā o ona po ia e lei afio ai o ia i se tasi o i latou; ua na ona papatisoina o i latou i le suafa o le Alii o Iesu.

"Ona la faaee atu lea o laua lima ia te i latou, ona maua lea e i latou o le Agaga Paia" (Galuega 8:14-17).

O le uluai tala ua faamatala mai ai le faamaloloina o le ma'i i le mana ma le pule mai le Atua. O le tala lona lua ua ta'ua ai le faaeega o lima e maua ai le mea alofa o le Agaga Paia. A ia tatou manatua, "e le fai fua foi e se tasi lenei faiva mamalu, tau o le ua filifilia e le Atua."

Ua toe aauina mai e le Atua ni perofeta ma aposetolo i ona po nei. Ua ia i latou foi le mana ma le pule ma ki o le malo o le lagi e pei ona faamatalaina atu. O nei perofeta ma aposetolo o loo ta'ita'iina le Ekalesia a Iesu Keriso o le Au Paia o Aso e Gata Ai.

E Tāua Perofeta ma Aposetolo

2009-03-06T10:15:00.004-07:00

Ua faapea ona saunoa mai le perofeta o Amosa, "E le faia lava se mea e le Alii o Ieova, a e faaalia lona finagalo i ana auauna o perofeta" (Amosa 3:7).

O le na tusia le tusi ia Eperu, o Paulo le aposetolo lea, na tusia e faapea, "O Iesu Keriso e le liu lava o ia o ananafi, ma le asō, e oo foi i le faavavau" (Eperu 13:8).

Afai e le'i faia lava se mea e le Alii i ona po o le Tusi Paia se'iloga ua na faaalia lona finagalo i perofeta, afai foi e le liu lava o ia, ua tatau ona ia faaalia pea lona finagalo i perofeta i le asō, e oo foi i le faavavau.

O lo'u lava molimau lenei: E iai ni perofeta ma aposetolo soifua toe valaaulia e le Alii oloo ta'ita'ia Le Ekalesia a Iesu Keriso o le Au Paia o Aso e Gata Ai.

Ua fai mai le tusi, "A leai se faaaliga, e faasalalauina le nuu" (Faataoto 29:18). Ua oo nei ia i tatou ni aso faigata. Ua vevesi le lalolagi i taua ma tala o taua. Ua popole ma fefefe tagata e toatele. Ana leai ni perofeta e tali faaaliga mai le Atua i ona po o le Tusi Paia, po ua faasalalauina faasoloatoa le nuu. E moni, ina ua le fia faalogo le nuu o le Atua i ana perofeta, sa faapena lava ona taia ma faasalalauina i latou. O le tasi faataitaiga o le tafeaga i Papelonia.

E pei ona fetalai le Alii ia Esekielu, e faapea foi ona fetalai mai le Alii i ana perofeta ma aposetolo i ona po nei: "Le atalii e o le tagata, ua ou faia oe ma tagata vaai i le aiga o Isaraelu; o le mea lea ia e faalogo mai ai le upu a lo'u gutu, ma e apoapoai atu ia te i latou mai ia te au" (Esekielu 3:17).

Talu ai ona ua toe valaaulia e le Atua ni perofeta ma aposetolo i ona po nei, e tāua lava ona tatou faalogologo ia i latou, auā ole'ā saogalemu ai o tatou ola e oo mai ai foi le filemu i o tatou loto. Ioe, "o ia te i tatou Ieova lo tatou Atua e fesoasoani mai ia te i tatou, ma tau ai o tatou taua" (2 Nofoaiga a Tupu 32:8). O le tasi ala e fesoasoani mai ai le Atua ia i tatou o lona valaaulia lea o perofeta ma aposetolo i ona po nei e ta'ita'ia i tatou.

Afai o ia te oe ni fesili e uiga i lenei savali, se'i fesili mai. Afai e te fia malamalama atili i nei mea, afai foi e te tautala faapalagi, ia susu atu i le www.mormon.org e maua ai nisi faamatalaga mananaia.

E le Tatau ona Tatou Popole

2009-03-05T10:21:00.003-07:00

Ua fai sina leva talu ona ou tusia se upu i lenei blog. (O le a le upu Faasamoa mo blog?)

E tele mea ua tutupu nei i le lalolagi atonu e oo mai ai le fefe po o le popole. Ae peitai, e le tatau ona tatou popole pe fefefe i mea e malaia ai le tino, a o mea e malaia ai le agaga atoa ma le tino e tatau ona tatou 'alo ese ai.

E moni, a tatou faatuatua ia Iesu Keriso, lo tatou Alii Faaola, ma usitai i ana poloaiga, e le mafai ona manumalo le tiapolo ia i tatou.

E le gata i lea, ua aauina mai e le Atua ni perofeta e leoleo i lana fanau i le lalolagi. O nei perofeta o taitai o Le Ekalesia a Iesu Keriso o le Au Paia o Aso e Gata Ai. E mafai ona e faitau ma faalogo i a latou aoaoga i Lipoti o Konafesi Aoao o le Ekalesia, po o la latou molimau i Le Keriso Soifua, po o upu ma aoaoga a le Perofeta o Iosefa Samita ua Faasamoaina.

Ou te ta'utino atu e oo mai le fiafia i lo'u loto pe a ou faitau pe faalogo i upu ma aoaoga a perofeta o ona po nei. O la latou galuega o le avea ma molimau i le Atua ma lona Alo pele o Iesu Keriso. E fesoasoani perofeta ia i tatou ina ia tatou toe foi atu e nonofo mau ma le Atua ma Iesu Keriso i le lagi pe a mavae le olaga nei.

Ua Fiafia i le Avanoa

2008-05-27T21:27:00.004-06:00

Ou te fiafia ona o lenei avanoa ua tuuina mai ia te a'u e ta'u atu ni o'u manatu i lenei blog. O lo'u igoa o Dan Holladay. E pei o Nate, o a'u fo'i sa faamisiona i le atunuu matalasi o Samoa. Ou te alofa foi i Samoa ma ona tagata. E ui ina ua uma la'u misiona, ou te fia auauna atu pea i tagata mai Samoa. O le avanoa sa ou maua e tala'i atu le tala lelei i tagata agalelei o samoa, o se mea e le mafaagaloina. Ou te fia molimau atu fo'i i le moni a upu ua tuuina atu e le susuga ia Nate. O Iesu Keriso o lo tatou alii Faaola. E ala i lana togiola e mafai ai ona tatou manuia i lenei olaga atoa foi ma le faavavau. O le'a ou toe faaaoga lenei blog i le lumana'i e toe fai atu nisi manatu e uiga i le tala lelei ma lo'u alofa mo Samoa.

Soifua

O le Paseka po o le Eseta

2008-03-18T05:17:00.004-06:00

Ua oo mai le vaiaso tatou te faamanatu ai le soifua ma le maliu ma le toe tu mai o Iesu Keriso. E ta'ua e Kerisiano lenei aso faamanatu o Paseka po o Eseta. A o a mea na tutupu ina ia paia ai Paseka po o Eseta? Aisea e taua ai Iesu Keriso i lo tatou olaga?

E pei ona tatou faitau i le Tusi Paia, na fanaua Iesu e Maria, a o le Tama o Iesu o le Atua lea. Talu ai ona fanaua Iesu e le Atua, e ta'ua Iesu o le Alo o le Atua. Ina ua soifua o ia, na mamana Iesu ona o lona sootaga faaleaiga ma lona Tama. Na lavatia Iesu le ave i ona luga a tatou agasala uma, o lona uiga, na mafaia e Iesu ona avea ma o tatou Faaola.

O aso o Isaraelu anamua, na osia ai taulaga i tamai mamoe e avea ma togiola mo Isaraelu. Ae peitai, ana le seanoa le taulaga o le Togiola moni, o Iesu Keriso lea, po ua le aoga taulaga uma a Isaraelu, aua e leai se mana i le toto o tamai mamoe e faaolaina ai le tagata. A o le toto masaa o le Tamai Mamoe a le Atua e mafai ai ona faaolaina i tatou uma lava.

Talu ai ona le atoatoa tagata uma lava, ua na'o Iesu lava e atoatoa lona soifua, e le mafai ona tatou sao atu i le malo o le Atua, aua e le mafai ona talia e le Atua se mea eleelea i lona malo. E mafai ona toe mama i tatou e ala i le togiola a Iesu Keriso. Afai tatou te salamo i a tatou agasala, afai tatou te gauai i aoaoga a perofeta, afai tatou te osi feagaiga ma le Atua i le ui ifo i le vai papatiso ma le mauaina foi o le mea alofa o le Agaga Paia i le faaee mai o lima e se ua iai le pule tatau a le Atua, afai tatou te tumau i le usitai i poloaiga a le Atua seia oo i le iuga o lo tatou olaga, e mafai ona tatou toe foi atu e nonofo i le malo o le Atua i le olaga a sau.

Na fetalai Iesu i upu e faapea, "Afai e le fanau se tasi i le vai ma le Agaga, e le mafai ona sao o ia i le malo o le Atua;" (Ioane 3:5) "Afai tou te alofa mai ia te a'u, ia outou tausi mai i a'u poloaiga;" (Ioane 14:15) "O le tumau [foi] seia oo atu i le gataaga, e faaolaina o ia." (Mataio 10:22)

O toe aso o lona soifua, na ave faamalosi ai Iesu e tagata amioleaga e fasiotia o ia. A'o le'i ave o ia i luma o Kaiafa, Pilato, ma Herota, na tigaina Iesu i le faatoaga o Ketesemane. Na tauaveina e Iesu o a tatou agasala uma. Na ia puapuagatia i a tatou puapuaga faaleolaga uma lava. O lea, e mafai ona tatou faalagolago ia Iesu. E ala ia te ia, e mafai ona ave esea a tatou agasala pe afai tatou te salamo faamaoni. E mafai foi ona ia faamafanafanaina i tatou pe a tatou mafatia.

Ina ua maliu Iesu i luga o le satauro, na tanumia o ia i le tuugamau i se faatoaga. Ina ua mavae aso e tolu, na o ane nisi o soo o Iesu i le tuugamau. Ina ua latou taunuu atu i le tuugamau, na latou vaai i ni agelu e toalua. "Ona la fai mai lea ia te i latou, Se a le mea tou te saili ai le ua soifua i e ua oti? E le o iinei o ia, a ua tu...." (Luka 24:5-6)

Ona o le toe tu mai o Iesu Keriso i le aso tolu, tatou te toe tutu uma ai pe a mavae le oti. Ona tatou o atu lea i le pa faamasino o le Atua, "e taitasi foi o i [tatou] ma faamasinoina e tusa ma a [tatou] amio." (Faaaliga 20:12-13)

Ou te iloa oloo soifua Iesu Keriso. O Iesu o lo tatou Alii, o lo tatou Faamoemoe, ma lo tatou Faaola. O Iesu "o le ala, ma le upu moni, ma le ola; e le alu atu lava se tasi i le Tama, pe a le ui mai ia te [ia]." (Ioane 14:6) Aisea e taua ai Iesu Keriso i lo tatou olaga? Aua e ala ia te ia tatou te toe ola ai.

O le Amataga

2008-02-25T08:18:00.001-07:00

O a'u o le tama a'oga faaiunivesite i le motu tele o Amerika. Na ou faamisiona i Samoa i tausaga e lua mo Le Ekalesia a Iesu Keriso o le Au Paia o Aso e Gata Ai. E moni, o a'u o le tama palagi, ae peitai, ou te alofa tele ia Samoa, le gagana ma aganuu Faasamoa, ae maise le mea taumafa Samoa.

O le uiga o le autu o lenei blog, O le Fetu Taiala, o lo'u nei faamoemoe e faamatala atu e uiga i o'u talitonuga ia Iesu Keriso, lo tatou Alii ma Faaola ma le Fetu Taiala moni, atoa ma lana Talalelei ma lana Ekalesia moni. Ou te iloa e mafai ona tatou sao atu i le lagi pe afai tatou te ui atu ia te ia. Ou te alofa tele ia Iesu. Na ia maliu faalavaau i le satauro ona o a tatou agasala uma. Na ia toe tu mai i le aso tolu; o lea, e mafai ai ona tatou toe ola uma pe a mavae le oti.

A'o soifua o ia, na talai atu e Iesu le savali a lona malo: o le Talalelei lea ia te ia. O le faatuatua ia Iesu Keriso o le uluai mataupu autu o le Talalelei. A leai se faatuatua, e le mafai ona fiafia mai o ia. A tatou faatuatua ia Keriso, tatou te saili e salamo i a tatou agasala ma usitai i ana isi poloaiga uma lava e pei o le papatiso i le faatofu mo le faamagaloina o agasala ma le faaee atu o lima o se ua iai le pule a le Atua mo le mea alofa o le Agaga Paia e pei ona ta'ua i tusitusiga paia.

Afai ua e faitau lenei savali, ou te faamoemoe ole'a e toe susu mai i lenei blog e toe faitau ai. Ia manuia le aso. Soifua!